Parewa.co | Halo dunsanak dinamopun barado, babaliak kito bakaba lamo, buliah nak tarang curito nangko, rila jo maaf dihatuakan dulu, buliah ndak salah dalam bakato.
A jadi mah sanak, bajalan kito mudiak batang bangko, lapeh nan ka Alam Surambi, kutiko korong baru babukak, kutiko kampuang alun lai rami. Nan tingga samaso itu, iyolah urang gadang rumah, ras raksasa sabutannyo. Samantaro di subalah bawah, tingga malah korong lamo, nan lah ado samanjak daulu, bukak urang Pagaruyuang, datang nan dari Batusangka.
Adopun pangka balanyo, iyolah pukaro sipadan tanah, nan manyabuik samaso itu, babateh nan dari batang bangko, ulunyo di Suliti, nan bamuaro ka Batang Hari. Namun sangketo pukaro nangko, batambah lamo batambah rumik, acok bacakak samaso itu, acok batumbuak dalam alu, urang Pagaruyuang jo Si Anja. Nan baujuang ka manjadi parang nagari.
Namun sabuah kajadian, kutiko hari alam malam, matohari manyuruak baliak bukik, bulan tabik di sumbunyo, kononlah kaluang tabang randah, mancari bungo durian nan sadang mangarakah. Tasintak malah Si Anja (konon namonyo raksasa nantun) mancaliak sakali ka bawah kini, ka arah nagari Muaro Labuah. Mako tampaklah bumi lakuak, labiah bak cando dalam kuali, konon manyahuik kutiko itu, ancak dibanaman nagari nantun buliah nak salasai kukaro tanah.
Jikok sanak mancigok nan dari Pekonina, dilayangan pandangan jauah, ditukiak-an pandangan dakek, nyayolah bana dalam diri, bahaso nagari sabana bantuak kuali. Mako itu nan tapikia dek Si Anja, diambiak tanah sakali langsuang, lalu bajalan ka bukik Apik nan kini ado di Kiambang, handak manyumbek pakok nantun, buliah manyanak aia nan datang.
Namun kutiko langkah ampia samapai kutiko badan handak tibo, sakutiko tabik matohari, mamancak nan dari baliak bukik, lapeh ka nagari nan rami nantun. Dek takuik ka nampak dek urang nan dari Alam Surambi, babaliak malah Si Anja ka bulakang, nan tanah dilatak sajo satantang jalan, lalu balari masuak rimbo, nan tanah tingga jo suratan. Itulah tanah nan manjadi bukik, bukik pamatang rang namokan, sabab sabana sabuah ado di sanan, lataknyo kini di bulakang MAN 1, nagari elok Muaro Labuah.
Jikok sanak manjolang ka sanan, mandapek malah pangajaran, baa duku urang nantun, basalisiah labiah bak cando kuciang, sampai handak manjadian danau, dek dandam kasumat bapaliharo, indak mamikian jalan kaluanyo.
(*)
