Parewa.co | Mancaliak kito nan ka ateh, manyilak mato nan ka udaro, manyolang curito lamo, mako dibaka malah kumayan putiah, asok mandulang ka udaro, lapeh ka langik tujuah pangkek, di sinan malah doa basarang, mintak buliah kandak balaku, bamulo malah curito nangko.
Kan iyo samaso itu, kutiko Inyiak Samsudin Sadewano, handak mancari tanah nan baru, manaruko nagari rancak, etan di tanah rang Sungai Pagu. Mako bajalan malah inyiak, lapeh nan dari Muaro Banda Lakun, handak manuju nagari nantun, tasintak malah diri nantun, kutiko sampai di Sungai Pagu, mangirok sakali ka nagari ateh, handak mancari tanah nan subur.
Mako sampai malah inyiak nantun, di tanah nan dimokasuik dalam diri, bahawa sajuak, ba aia dingin, pamandangan nan sabana santiang, dek batampek nan di ateh, ambak sugalo pamandangan, salasai mato nan mamandang. Mako dibari malah namo, banamo kampuang Banuaran, itulah kampuang jolong babukak, kampuang nan tuo di Sungai Pagu.
Sasudah ditanam padi satampang baniah, dibuek malah banda sabuah, dibangun rumah sarato kincia, bamufakat sakalian urang nan ado, bahaso ka mambangun sabuah karajaan, etan di nagari Sungai Pagu, di bawah nagari Banuaran, batitah malah Inyiak Samsudin, untuak mambagi urang nan ado, bahaso ado nan turun ka bawah, mambangun Kerajaan Alam Surambi.
Itulah asa-muasa Alam Surambi, tasabuik kaba dalam tambo, sampai kini baitu juo, etan di nagari Sungai Pagu, Solok Selatan rang namokan. Jiko ado sanak wakatu, bajalan malah ka situ, manjolang nagari nan rancak nantun.
(HA)
