Parewa.co | Niniak mamak nan labiah dikenal jo sabutan pangulu adolah pemimpin adat di Minangkabau, samantaro kapamimpinan niniak mamak ko adolah kapamimpinan tradisonal. Sasuai jo pola nan alah digarisan dek leluhur leluhur sacaro turun tamurun dalam artian kato patah tumbuah hilang baganti.
Surang ndak mungkin ka bafungsi sabagai niniak mamak dalam adat masyarakat kalau dalam kaum sandiri ndak ado gala kabasaran nan diusuang, pangulu tun dipiah dek tinggi tampak jauah, gadang tampak dakek, aratinyo gadang dilingang pungkam punyo urek tunggang nan mahujam dalam ka tanah.
Nan pangulu ko tinggi bukan karano diganja, gadang bukan karano disantakkan, namun makasuiknyo mamiliki kapribadian nan bailmu sararo wawasan nan lueh, tau jo alua nan ka patuik, tau dek rantiang nan ka maimpok, jaleh jo batu nan ka manaruang.
Kalau bak kato, pangulu tun padangnyo leba, alamnyo laweh, tinggi dek dianjuang, gadang dek diambak, aratinyo pangangkatan pangulu tun sasuai jo kasaluruahan kaum, landasan nan dipaciak adolah undang-undang atau hukum adat, satiok pangulu harus tau jo hukum adat, baik itu adat sabatang panjang sarato adat salingka nagari.
Jabatan pangulu sabagai pamaciak sako, nan diturunan sacaro turun-tamurun dari garis katurunan ibu (matrilineal) sabagai pengawas, nan maurus, atau nan mamantau, sarato manjalanan saluak baluak adat. Dalam papatan Minangkabau dijalehan sabagai, nan didahulukan salangkah, nan ditinggikan sarantiang, ka pai tampek batanyo, ka pulang tampek barito.
Niniak mamak atau pangulu nan tau jo tugssnyo sarato manjalankan apo nan alah manjadi karajonyo diibaratkan dalam papatah, akanyo tampek duduak, batangnyo tampek basanda, dahannyo tampek bataduah. Itulah mamak nan sasungguahnyo, ka manjadi tampek batanyo sarato tampek mangadu dari sakalian suku atau klan.
Adopun prinsip dari karajo pangulu adolah bapantang kusuik indak ka salasai, bulu nan kusuik paruah nan manyalasaikan, banang nan kusuik api nan ka manyalasaikan, bapantang katuah indak ka janiah, baitu bana dalam alam Minangkabau. Aratinyo satiok masalah nan tajadi pasti bisa disalasaikan jo caro musyawarah.
(HA)
