Parewa.co | Halo dunsanak dimanopun barado, babaliak kito jo carito lamo tentang makhluk-makhluk nan indak bisa dicaliak jo mato talanjang sanak. Kalau menurut sanak baa soal kehadiran urang gaib atau jin atau setan tu sanak?
Sasudah sabalunnyo awak bacurito tentang antu Suluah, kini wak cubo pulo sabuah tentang Urang Bunian sanak. Nan kito tau amaiklah banyak versi nan mancaritokan tentang Urang Bunian ko sanak, ado nan mangatokan kalau Urang Bunian tingga di gunuang, di lubuak-lubuak larangan, rumah-rumah tingga, atau batang kayu gadang sarato gua. Namun sabuah nan bisa kito pastikan sanak, bahaso Urang Bunian ko indak iduik di alam manusia. Ado pulo nan mancaritokan bahasan urang bunian ko suko mancilok anak ketek kutiko hujan sanak. Ado baun-baun makanan nan manjadi daya tarik anak ketek tun untuak maikua jo urang Bunian, nan banyak disabuik sabagai Samba Dewa.
Nah iko ado curito sabuah sanak, kutiko bajalan ka pedalaman lembah Alahan Panjang, masuak nan dari danau di ateh luruih sarato ka Sariak Alahan Tigo, di sinan ado namonyo kampuang Sianggai-anggai sanak, dakek kampuang tun ado bukik sabuah, nan bukik tun sabana rapek tumbuhan tumbuah di sanan sanak.
Jadi, kutiko datang ka sinan, bacarito malah urang kampuang bahaso dulu Urang Bunian mandulang ameh di sanan, bahkan sanak, urang Bunian tun maminjam alat-alat lo ka urang kampuang situ sanak. Kalau alah tadanga bunyi urang manokok-nokok batu tangah malam, bararti sadang manambang urang tun mah sanak.
Sasudah itu ado sabuah lai sanak, katonyo urang sinan maso saisuak kalau handak baralek maminjam pinggan sarato salada ka urang Bunian tun sanak, tapi untuak nan sabuah iko yo ado syarat e sanak, nan pinggan pinjaman harus cukuik kutiko dibaliak an, atau jikok sampai pacah sugiro dicarikan gantinyo. Nan pantiang ituangan pinggan kutiko dipinjamkan samo jo kutiko maminjam.
Kalau di kampuang sanak lai ko ado curito nan sarupo itu sanak? Baelah duduak mangopi wak sambia curito sanak. Wak tulis pengalaman nan banyak tun, kirim se ka wa iko sanak jiko ado, +62 822 8385 5009. Nah nan sasudah itu baa lai sanak? Sampai sekarang lai baitu juo bukik di Sianggai-anggai tu nyo sanak, nan bunyi urang manokok batu tun sakali-sakali lai tadanga juo.
(*)
