Parewa.co | Halo dunsanak dimanopun barado, sabalunnyo mamohon ampun nan jo maaf kapado dunsanak sakalian, bahaso bulan puaso nan ka masuak, kok dapek kutiko bulan puaso masuak wak japuik basamo jo hati nan barasiah handaknyo sanak. Kan iyo baitu sanak?
Ha dek iko mah sanak, sabalun masuak bulan puaso ko yo sabana rami objek wisata pamandian mah sanak. Tadi tim parewa lewat di Padang Panjang sanak, nan pamandian di lembah Anau ndak tatangguang rami umat do sanak, baratuih honda nan tibo sanak. Manga tuh? Ka manga juo lai kalau ndak pai balimau basamo sanak. Sabuah kebanggaan nan alah ado sajak dulunyo mah sanak, kutiko ka masuak puaso pai mandi-mandi rami dulu nan tasabuik jo balimau sanak.
Itu alah manjadi budaya nan sampai kini balangsuang mah sanak. Nan sanak kama balimau puaso kini sanak?
A samantaro balimau kito simpan dulu sanak, mananjak kito sabanta ka nagari tuo Pariangan dulu sanak. Manuruik tambo nan babilang dari sinan malah asa-muasanyo niniak moyang urang Minangkabau sanak, dari lereng gunuang Marapi kutiko kapa Sri Maharajo Dirajo tasakek di puncak Marapi nan kutiko itu masih sagadang talua itiak.
Alah ko sudah nan bak nantun, kutiko aia lawik nan lah susuik, turun malah ka Pariangan mambao padi satampang baniah, mambuek korong nan jo dusun sarato kampuang nan jo koto. Nan urang alah samakin rami nan panduduak alah samakin banyak kutiko itu sanak, mako tasabuik malah Pariangan sabagai nagari nan paliang tuo nan ado di ranah Minang.
Indak sampai di dinan sajo do sanak, tahun 2012 Pariangan ditetapkan sebagai desa terindah di dunia versi Travel Budget sanak, kok destinasi wisatanyo sabana mantap sanak, dari mulai sawah nan bajanjang, aia angek sarato rumah gadang nan babilang ado sadoalah e sanak. Tahun 2022 patang ko baru a sanak, Pariangan mandapek Anugerah Desa Wisata lo dari kemenparekraf sanak. Banyak potensi sarato prestasi nan alah diraihnyo sanak.
Kutiko awak patang mangecek tentang kawa, a agak sakali pai pulolah ka Pariangan mangicok kawa nan disiko sanak, kok raso usah ka ditanyo lai sanak, duo jempol kito agiah ka sanak sakali. Minum kopi kawa sambia mamandang alam nan masih asri yo sabana tanang pangana dek e mah sanak.
(*)
