Parewa.co | Halo dunsanak nan sadang barado di bumi, batamu baliak kito di Parewa dalam konten Kaba. Nah kali kini wak ka maajak sanak bajalan jauah ko mah sanak, yaitu ka wilayah Solok Selatan, sakitar ampek jam an kalau dari kota Padang sanak. Kua nan ado di sinan tuh? A jadi sanak, di sinan ado sabuah PLTA persero Solok, ranting Muaro Labuah nan alah ado samanjak zaman Bulando dulu sanak, baa pulo itu molah wak bajalan lai sanak.
Nah dari Padang bajalan wak sampai Alahan Panjang sanak, luruaih masuak nagari Surian manyaruak di Sungai Kalu lapeh ka Pinang Awan, di sinan lataknyo barang tun sanak, bangunan bagerbong gadang mambanduang batang bangko.
A jadi mah sanak, barang tu adolah satu-satunyo warisan saksi kejayaan kina nan alah ado di maso lalu. Urang-urang tun manyabuik namonyo Bangkol, di sinan hadirnyo dulu sabuah kabun kina nan amaiklah lueh e do sanak, urang nan karajo di sanan diangkuik dari Jawa, dikarajoan, diagiah rumah langkok-langkok. Ma samaso itu nagari Bangkol tun sabana jaya dek ado pembangkit listrik surang.
Indak sampai di sinan se do sanak, indak lamo sasudah Bangkol tagak pulo pesaingnyo nan kini manjadi PT Mitra Kerinci, kabun teh nan lieh dahinggo Kayu Aro di Kurinci tun masih tadabuik mudo daripado Bangkol. Rumah-rumah basusun sapanjang jalan, bahkan kutiko Indonesia alah merdeka dan teknologi alah samakin bakambang, tagak sabuah pemancar TVRI di sinan sabuah sanak, sampai kini masih ado barang tun. Buliah sanak pastian bana ka sinan.
Namun ado sabuah tragedi nan mambuek Bangkol manjadi bangkrut sanak, yaitu kutiko harago kina jatuah. Sekitar tahun 70-an, Bangkol baransua bangkrut, urang nan didatangkan ndak ado lai, bahkan nan alah karajo pun dikurangi untuak mampaketek dana nan kalua. Baransua sapanjang tahun 80 kina habis, Bangkol tingga namo se lai.
Nan PLTA tun dialihkan ka PLN dan dijadian rantiang dek PLTA di Balun Muaro Labuah, samantaro urang nan bakarajo tun manyebar mambantuak kampuang Jawa nan sampai kini masih ado. Bangko ilang, baganti jo rimbo gadang sampai kini.
(*)
