Parewa.co | Halo dunsanak di manopun barado, babaliak kito jo kaba lamo nan mambahas hal saputa Minangkabau sanak, nan sakali kini iyo ka kito bahas tantang rang sumando mah sanak, sabab ndak ka mungkin kito bisa sakali pembahasan langsuang salasai soal Minangkabau kok, banyak malah judul nan sana ka kito bahas sanak, baiak dalam hal sejarah maupun tata kelola Minang nan alah ado sajak zaman daulunyo sanak.
Babaliak kito sanak, nan asa muasa kato sumando ko ado duo mah sanak, nan barasa dari alias bahasa Malayu lamo sanak. Nan partamo adolah su nan bararti badan, nan kaduo mandah nan bararti manumpang untuak samantaro. Nan jikok kito gabuangkan kaduo kato ko sanak, dapek diartian sabagai urang nan manumpang badan untuak samantaro. Nan dalam arati globalnyo sumando adolah urang nan datang dek diikek jo tali parnikahan, nan berwenang sumando ko hanyo sahinggo pintu biliak sajo, atau dalam istilah Minang; Sadalam-dalam aia sahinggo dado itiak, saelok-elok sumando sahinggo pintu biliak. Aratinyo sanak, ditugaskan nan ado dek diri sumando hanyo sahinggo pintu biliak sajo, sabab lua nan daripado itu ndak lai manjadi berwenangnyo dek sumando di Minangkabau hanyo dalam status manumpang, inyo ndak bisa mancikaroi urusan panguni rumah do sanak.
Untuak istilah lain rang sumando ko ado pulo sanak, yaitu; Sumando bak ibarat abu di ateh tungku, tibo angin kancang abu batabangan. Mukasiknyo urang sumando hanyo sabagai panompang sajo sanak, indak ado pengaruhnyo dalam kehidupan urang rumahnyo sanak. Jadi kalau masalah keluarga urang rumah nan urang sumando ko ndak bisa bana ikuik campua do sanak, sabab itu ndak manjadi urusannyo atau alah dilua pintu biliaknyo.
Sudah itu ciek lai sanak, pukaro duduak basamo kutiko ado partamuan sanak. Nan duduak urang sumando ko di tangah rumah mah sanak, mahadok ka niniak mamak atau datuak dari pihak urang rumah sanak. Baa kok modus itu? Sabab sumando dalam isyaratnyo madok ka niniak mamak sabagai patunjuak atau tando tanyo mah sanak. Nan niniak mamak batanyo ka sumando apo ko ka karajo sasudah barumah tanggo? Nan dek sumando batanyo malah ka niniak mamak rang padusi ado ko sawah atau ko ladang nan bisa digarap, Datuak? Baitu bana dalam Minangkabau ko diatur sanak.
A mungkin sakian dulu mah sanak, kalau ko soal tipe sumando di Minangkabau, sabuik malah sumando lapiak buruak, sumando mato karanjang, sumando kutu dapua bagai di tulisan salanjuiknyo kito bahas dih sanak. Nan kini kito paham malah nan saketek nangko dulu sanak.
(*)
